Rritja e pagës minimale – ISSH: 14 mln më shumë nga sigurimi vullnetar
Rritja e pagës minimale për efekt të llogaritjes së kontributeve shoqërore u reflektua në skemën e sigurimit vullnetar, duke rritur të ardhurat me rreth 14 milion lekë.
Sipas të dhënave të ISSH-së, për 6-mujorin e parë të vitit, të ardhurat kapën vlerën e 266 milion lekëve ose 44 milion lekë më shumë, krahasuar me të njëjtën periudhë të një viti më parë.
Influencë në rritjen e të ardhurave pati edhe shtimi i kontribuesve të siguruar vullnetarisht në skemë, duke rritur të ardhurat me 30 milion lekë. Për 6-mujorin e parë të këtij viti, numri i personave të siguruar vullnetarisht ka arritur në 2,869, nga të cilët 1,943 janë kontribues në vazhdimësi dhe 925 janë kontribues të rinj.
Pas rritjes së pagës minimale për efekt të llogaritjes së kontributeve, personat që sigurohen vullnetarisht, vetëm për degën e pensioneve duhet të paguajnë një kuotë mujore prek 5.184 lekësh, nga 4 752 lekë që ishte më parë.
Me këtë kuotë mujore, mund të paguhen edhe muajt për vitet e kaluar, për të cilat personi kërkon të bëjë sigurim vullnetar. Ndërkohë që, sigurimi vullnetar për vitin aktual mund të bëhet për më shumë se paga minimale, duke zgjedhur deri në pagën maksimale që aktualisht është 105,850 lekë, me një kuotë mujore prej 22,865 lekësh.
Përfitimet nga skema e sigurimeve përfshijnë pensionet bazë të pleqërisë, invaliditetit dhe familjar, si dhe pensione më të larta se niveli bazë, sipas llogaritjeve mbi shumëfishin e pagave te paguara.
Të drejtën për të përfituar nga kjo skemë e kanë të gjithë shtetasit shqiptarë, që kanë mbushur moshën 18 vjeç dhe akoma nuk iu ka lindur e drejta për ndonjë përfitim nga skema e sigurimit të detyruar; që për një kohë dhe shkaqe të caktuara nuk mund të sigurohen nga skema e sigurimit të detyrueshëm apo ata që kërkojnë të rrisin të ardhurat e tyre.
Gjithashtu, të drejtën e kanë edhe ata persona që nuk janë pjesëmarrës në skemën e të vetëpunësuarve në bujqësi.
Procedurat për sigurimin vullnetar mund të kryhen pranë Agjencive Lokale të Sigurimeve Shoqërore, në çdo qytet.
Ola Mitre/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.