“Rritja e varësisë ndaj alkoolit”, për shkak të krizës ekonomike

“Ne jemi të shqetësuar për rritjen e konsumit të tepërt të alkoolit në mesin e adoleshentëve dhe përdorimit në masë në përgjithësi, veçanërisht në zonat provinciale”, tha ministri grek i Shëndetësisë Andreas Xanthos.

Xanthos foli në Kongresin e 16-të Ndërkombëtar të Shoqërisë Europiane të Kërkimeve Biomjekësore mbi alkoolin (ESBRA), duke theksuar rritjen e varësisë së alkoolit në Greqi gjatë krizës ekonomike, veçanërisht në shtresat më të ulëta sociale. Ai tha se përdorimi i tepruar i alkoolit kontribuon në pabarazitë shoqërore, margjinalizimin dhe përjashtimin social.

Megjithatë, ministri grek i shëndetësisë vuri në dukje se konsumi i alkoolit për numër banorësh në Greqi, është relativisht më i ulët se mesatarja evropiane, shkruan greekreporter.

Sa i përket veprimeve të ndërmarra nga Ministria e Shëndetësisë në lidhje me këtë çështje, Xanthos tha se ministria promovon një plan për riorganizimin e kuadrit institucional mbi varësitë, përfshirë alkoolin dhe hartimin e një plani strategjik kombëtar për parandalimin dhe trajtimin e varësive.

E.Z/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.