Rritja e “yield”-eve në SHBA mbështet Dollarin – Euro bie poshtë 1.07 USD, jeni në nivelin më të ulët në 2 dekada

Dollari amerikan është forcuar ndjeshëm gjatë sesionit të sotëm, sidomos gjatë tregtisë aziatike, duke prekur sërish nivelin më të lartë në 20 vitet e fundit përballë jenit japonez. Shqetësimet për inflacionin e lartë në SHBA kanë rritur yieldet e obligacioneve amerikane dhe për rrjedhojë edhe dollarin. Gjithashtu, monedha e gjelbër është rritur edhe në raport me euron dhe frangën zvicerane.

Në këtë mënyrë, euro ka rënë sërish poshtë nivelit të 1.07 dollarëve. Yieldi i obligacioneve 10-vjeçare amerikane u rrit në 3.05% dhe për këtë arsye dollari u rrit deri në 132.3 jen, niveli më i lartë që nga prilli i vitit 2002. Në anën tjetër, obligacionet ekuivalente japoneze janë fiksuar pranë zeros nga Banka e Japonisë. Të dhënat pozitive mbi punësimin në SHBA gjatë javës së kaluar rritën bastet se çmimet do të kenë vijuar rritjen edhe gjatë muajit të kaluar, që mund të detyrojnë Rezervën Federale të rrisë sërish normën bazë të interesit.

Të dhënat mbi inflacionin që do të publikohen të premten pritet të japin një panoramë më të qartë mbi vendimet që do të marrë banka qëndrore më e madhe në botë, në takimin e javës së ardhshme. Indeksi që mat ecurinë e dollarit amerikan, përballë gjashtë monedhave kryesore ndërkombëtare është rritur në rreth 102.5.

Gjithashtu, investitorët po presin edhe takimin e Bankës Qendrore Europiane të enjten. Në tregun e kriptovalutave, vihet re një rënie e ndjeshme, me bitcoin që po tregtohet poshtë 30 mijë dollarëve, ndërsa ethereum po tregtohet në rreth 1750 dollarë.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.