Rritja ekonomike do të ulet në 2.9% – Banka Botërore rishikon projeksionin për vitin 2019

Banka Botërore e ka ulur ndjeshëm parashikimin për rritjen ekonomike të Shqipërisë në vitin 2019. Në raportin periodik ekonomik të vjeshtës për Ballkanin Perëndimor, Banka Botërore parashikon një rritje ekonomike prej 2.9%, nga 3.7% që kishte qenë projeksioni i mëparshëm.

Në mënyrë të paevitueshme, rritja mjaft e dobët për dy tremujorët e parë të vitit i ka bërë edhe parashikimet vjetore më pesimiste.

Sipas Instat, ekonomia shqiptare u rrit me 2.2% në tremujorin e parë dhe me 2.3% në tremujorin e dytë të këtij viti. Deficiti në sektorin energjetik vlerësohet të ketë qenë faktori me ndikimin kryesor në ngadalësimin e rritjes.

Për dy vitet e ardhshme, megjithatë, Banka Botërore parashikon një përmirësim të rritjes pranë vlerave mesatare prej 3.5%, pikë që për momentin konsiderohet si niveli potencial i rritjes së ekonomisë shqiptare.

Në dy vitet e fundit, ekonomia shqiptare përjetoi një cikël rritjeje edhe më të lartë se potencialet e veta, me mesatarisht rreth 4%, e nxitur fillimisht nga projektet e mëdha të investimeve të huaja si edhe nga një vit i mbarë për prodhimin e energjisë elektrike.

Por, tani që këta faktorë janë tejkaluar, pritet që rritja të stabilizohet në nivele disi më të ulëta. Nxitësi kryesor do të jetë përmirësimi i kërkesës së brendshme, por rreziqet janë në rritje.

Ngadalësimi i ekonomisë së Eurozonës pritet të japë ndikim negativ në eksporte dhe në bilancin e llogarisë rrjedhëse.

Ndër rreziqet e brendshme, Banka Botërore rendit si më domethënësit ato të lidhura me kontratat e PPP-ve, paqëndrueshmërinë politike dhe zbatimin e ngadaltë të reformave strukturore.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.