Rritja ekonomike në Kinë – Ka gjasa të ngadalësohet në 6.5-6.8% këtë vit
Rritja e ekonomisë kineze ka gjasa të ngadalësohet në segmentin 6.5-6.8% këtë vit, tregojnë zyrtarët e lartë të partisë komuniste. Ekonomia e dytë më e madhe në botë u rrit me 6.9% në vitin 2017, që është përshpejtimi i parë vjetor që prej 2010-ës. Norma e rritjes theu lehtë projeksionet e qeverisë për një rritje të Produktit të Brendshëm Bruto me 6.5%, duke sjellë lajme pozitive për politikëbërësit që po përpiqen të trajtojnë rreziqet financiare dhe ulin borxhin e korporatave.
Sipas zv/sekretarit të Komisionit Kombëtar të Zhvillimit dhe Reformave, Fan Hengshan, rritja ekonomike këtë vit ka gjasa të kalojë 6.5%-shin. Ndërkohë, zyrtarët e Bankës Qendrore presin një ngadalësim të rritjes në 6.5% këtë vit, kryesisht prej rënies së shitjeve në prona dhe investimet më të ulëta në infrastrukturë. Më herët gjatë muajit, rregullatorët e bankingut në Kinë deklaruan se ekzistojnë rreziqe të papritura ndaj stabilitetit financiar.
Agjencitë globale të vlerësimit të kreditit S&P dhe Moody’s, kanë zhvlerësuar borxhin sovran të kinës vitin e kaluar, duke theksuar shqetësime në lidhje me rritjen masive të borxhit. Kjo sipas zyrtarëve, ka ardhur prej stimujve në kreditim, që janë ndërmarrë për të arritur objektivat e rritjes ekonomike.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.