Rritja nga interesat e ulëta, BSH: Pa to, ekonomia do të rritej 0.5% më pak

Normat e ulëta të interesit e kanë nxitur rritjen ekonomike me gjysmë pike përqindjeje.

Gjatë fjalës së tij Komisionin Kuvendor të Ekonomisë, Guvernatori Gent Sejko tha se, sipas llogaritjeve të Bankës së Shqipërisë, në mungesë të stimulit të fortë monetar, ekonomia shqiptare për vitin e kaluar do të ishte rritur me 0.5 pikë përqindjeje më pak, ose rreth 3%.

Sipas Bankës së Shqipërisë, normat e ulëta të interesit e kanë nxitur ekonominë përmes rritjes së kreditimit, uljes së shpenzimeve për interesat e kredive ekzistuese dhe nxitjes së konsumit dhe investimeve.

Megjithatë, Guvernatori pranoi se transmetimi i plotë i politikës monetare në ekonomi ka pengesa serioze dhe më kryesoret janë niveli i lartë i kredive me probleme dhe euroizimi i ekonomisë.

Banka e Shqipërisë pret përmirësim të mëtejshëm të rritjes ekonomike gjatë këtij viti, ndonëse nuk është shprehur me një parashikim të saktë pikësor.

Megjithatë, kthimi i ekonomisë pranë niveleve të rritjes potenciale nuk është pa rreziqe dhe më të fundit lidhen sidomos me tensionimin e klimës politike.

Ersuin Shehu/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.