Rritje e lehtë për euron dhe stërlinën – Dollari i qëndrueshëm në 105.3 lekë
Tregu vendas i këmbimit valutor ka regjistruar vetëm disa luhatje të lehta gjatë ditës së sotme, duke vijuar të mbajë lekun në pozita dominuese ndaj monedhave të huaja.
Euro është rritur lehtë ditën e sotme me vetëm 0.1 pikë, por duke qëndruar në nivele të ulëta për këtë muaj. Euro këmbehet sot për 128.7 lekë, por trendi tregon se valuta mund t’i rikthehet sërish rënies.
Rritje ka patur edhe për paundin britanik, i cili ka grumbulluar 0.5 pikë ndaj lekut. Stërlina këmbehet sot për 147 lekë, duke mbetur në nivelet më të ulëta të 8 muajve të fundit. Negociatat me BE-në pritet që këtë javë të prekin çështjet e tregtisë dhe aksesit në unionin doganor, çka mund të shënojë një fitore të vogël për qeverinë e Theresa May dhe t’i japë një shtysë valutës së Britanisë.
Ndërkohë, dollari amerikan e ka nisur ditën i pandryshuar, në kuotën e 105.3 lekëve. Yieldi i bonove 10-vjeçare të Shteteve të Bashkuara ka prekur nivelin më të lartë që prej vitit 2014, duke bërë që dollari t’i gëzohet avantazhit ndaj valutave të huaja në tregjet ndërkombëtare.
Po ashtu e paluhatur në vlerë shfaqet edhe franga zvicerane, e cila prej gati dy javësh fiksohet në kuotën e 107.3 lekëve.
Sa i takon valutave të tjera, dollari australian ka regjistruar një rënie prej 0.4 pikësh ndaj lekut ditën e sotme, ndërsa dollari kanadez ka patur një rënie prje vetëm 0.2 pikësh.
A.H./SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.