Rritje rekord e bizneseve shqiptare në Itali! Në total, 47 mijë sipërmarrës, rritje me 5% krahasuar me 2018-ën

Janë 46.917 sipërmarrës shqiptarë të cilët operojnë në Itali, thonë të dhënat më të fundit nga raporti mbi ekonominë e emigracionit të fondacionit “Leone Moressa”.

Të dhënat i referohen vitit 2019 dhe tregojnë se në krahasim me vitin paraardhës, numri i sipërmarrësve shqiptarë në Itali është rritur me 5%. Krahasuar me vitin 2010 ndërkohë, rritja fiksohet në masën 34%. Gjatë vitit të fundit, rritja prej 5% është e dyta më e madhe pas sipërmarrësve nga Pakistani.

Sipërmarrësit shqiptarë ndërkohë, përfaqësojnë 6.5% të ndërmarrjevë të të huajve në Itali, dhe janë të 4-tët në listë, pas shtetasve nga Kina, Rumania dhe Maroku. Të dhënat llogarisin bizneset të cilat kanë të paktën një pronar të huaj, të lindur qoftë jashtë, qoftë brenda Italisë.

Sa i përket shqiptarëve të cilët jetojnë në Itali, në total, viti 2020 numëron rreth 440.854. Vitin paraardhës, kjo shifër fiksohej në 428 mijë individë. Shifrat e viteve të fundit sinjalizojnë një “rikthim” të shqiptarëve në Itali, qoftë si punëtorë të thjeshtë, qoftë si sipërmarrës.

Roel Korkuti/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.