Rrjet dyqanesh nën një logo – 20 aplikantë për brandin e produkteve shqiptare
Një sërë dyqanesh që prodhojnë produkte tipike shqiptare do të kenë një markë të vetme, duke krijuar kështu një rrjet që të jetë i njohur jo vetëm brenda vendit por edhe jashtë tij. Më 28 Shkurt janë mbyllur aplikimet në konkursin për përzgjedhjen e brand-it të rrjetit më të ri të dyqaneve me prodhime shqiptare, ku synohet brand-i sa më dinjitoz, i cili përfshin logon, emrin, sloganin, dizajnin, pamjen vizuale në 3D si dhe arredimin e dyqaneve me prodhime shqiptare.
Në total janë regjistruar 20 aplikime të cilat kanë kaluar në sitën e një jurie të posaçme dhe me datën 6 Mars do të bëhet prezantimi i ideve të përzgjedhura nga juria, ku dhe do të shpallet marka fituese. Fitusi i konkursit do të shpërblehet me një çmim prej 5 mijë dollarësh. Ndërkohë që për të gjithë ata që duan të ngrenë një dyqan që plotëson të gjitha kërkesat e brand-it që do të përzgjidhet, janë vendosur në dispozicion nga Ministria e Bujqësisë, grante deri në vlerën e 20 mijë dollarëve.
Në këtë mënyrë i kushtohet rëndësi ushqimit tradicional dhe produkteve ushqimore autoktone, të cilat janë elemente kryesore në tërheqjen e turisteve të huaj ose vendas.
Elisabeta Dosku/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.