Rrjeti i bankave – Numri i degëve, në rënie edhe për 2017

Rrjeti i degëve dhe agjencive të bankave pësoi një rënie të mëtejshme gjatë vitit 2017. Sipas të dhënave nga Shoqata Shqiptare e Bankave, rrjeti i bankave është zvogëluar me nëntë njësi. Në fund të dhjetorit, sistemi bankar kishte 494 degë dhe agjenci. Që nga vitit 2012, numri i degëve është ulur me rreth 60 njësi.

Kriza dhe përkeqësimi i portofolit të kredisë e zhvendosi fokusin e bankave nga zgjerimi drejt konsolidimit të aktivitetit dhe uljes së shpenzimeve, çka solli edhe mbylljen e degëve dhe agjencive që nuk konsideroheshin fitimprurëse. Një faktor tjetër është edhe roli në rritje i teknologjisë, që gradualisht po i zëvendëson disa shërbime që tradicionalisht janë kryer në sportelet e bankave.

Sidoqoftë, Shqipëria është ende prapa krahasuar me tregjet e zhvilluara, për sa i takon depërtimit të shërbimeve dixhitale në shoqëri, ndaj prania e rrjetit të degëve ngelet ende e rëndësishme për operacionet bankare.

Sistemi bankar shqiptar është kthyer te strategjia e rritjes në segmentin e shitjeve me pakicë, që përbëhet kryesisht nga shërbimet për individët dhe bizneset e vegjël. Fokusi në këtë segment kërkon një dendësi më të madhe të degëve dhe agjencive. Në këtë tregues, Shqipëria është mbrapa krahasuar me vendet e tjera të rajonit.

Sipas Bankës Botërore, në vitin 2016, Shqipëria kishte 21.5 degë bankare për 100 mijë banorë, duke mbajtur vendin e parafundit në rajon, para Kosovës. Vendet e tjera të rajonit kanë një përqendrim të degëve bankare në intervalin mes 25 dhe 30 degë për 100 mijë banorë, me përjashtim të Malit të Zi, ku dendësia e njësive bankare është shumë më e lartë, me 44 për 100 mijë banorë.

Ersuin Shehu/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.