Ruçi kërkon mbledhjen e Konferencës së Kryetarëve: Të bëhen nesër dy raundet e tjera, ose të zgjidhet Presidenti, ose vendi në zgjedhje
Ashtu siç ishte njoftuar edhe më parë, Parlamenti zhvilloi raundin e tretë për zgjedhjen e Presidentit, ku në garë nuk u paraqit asnjë kandidat. Kreu i Kuvendit Meta referuar edhe rregullores theksoi se votimi për raundin e tretë kryhet jo më vonë se 7 ditë dhe votimi quhet i kryer edhe kur në garë nuk paraqitet asnjë kandidat.
Nga ana tjetër, kryetarja e Komisionit të Ligjeve Vasilika Hysi theksoi se:
“Komisioni i ligjeve u mblodh sot rreth orës 13:00 sipas përcaktimit të Konferencës së Kryetarëve. Deri në afatin e përcaktuar, asnjë kandidat për President nuk është paraqitur në garë”
Kreu i grupit parlamentar të PS, Gramoz Ruçi nga foltorja e Parlamentit kërkoi “Të zhvillohet Konferenca e Kryetarëve dhe që nesër të bëhen dy raundet, ose të zgjedhim Presidentin e ri, ose vendi të shkojë në zgjedhje për 45 ditë, siç e përcakton Kushtetuta”.
Kreu i Grupit Parlamentar të PS, Ruçi ndër të tjera pohoi se afatet për dialog kanë përfunduar:
“Ne Socialistët i kemi bërë llogaritë tona, ne i kemi 71 votat edhe pa LSI-në. Ne gjykojmë se duhet të zgjedhim Presidentin e ri, nesër të kemi seancë për zgjedhjen e tij. Duhet të zgjedhim Presidentin e vendin nga ky Parlament, afatet për dialogun kanë përfunduar.”, theksoi Ruçi.
Osman Dedja/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.