Rusët po largohen nga vendi drejt Dubait pasi Putin kërcënoi se do të spastronte Rusinë nga tradhtarët!
Katër avionë privatë u larguan nga Rusia për në Dubai të enjten, pasi presidenti rus Vladimir Putin u zotua për një “vetëpastrim” të shoqërisë ruse. Analisti danez Oliver Alexander vëzhgoi katër avionët që niseshin nga Moska për në Dubai të enjten në mëngjes duke përdorur shërbimin e gjurmimit të fluturimeve FlightRadar24. Ai e përshkroi atë si një “eksod”.
Nuk është e qartë se kush ishte në bordin e avionëve dhe çfarë arsye kishin ata për t’u nisur drejt Dubait, i cili, ndryshe nga destinacionet perëndimore, nuk e ka ndaluar trafikun ajror rus. Avionët privatë u panë gjithashtu duke shkuar nga Rusia në Izrael në fillim të këtij muaji, ndërsa sanksionet perëndimore ndaj oligarkëve rusë filluan të ‘kafshojnë’.
Mijëra njerëz janë përpjekur të largohen nga Rusia që kur ajo filloi pushtimin e saj të Ukrainës më 24 shkurt, nga frika se si do të ishte jeta atje pasi ajo është gjithnjë e më e izoluar nga pjesa tjetër e botës. Disa rusë që u larguan thanë se ata u larguan sepse kishin frikë nga ndalimi dhe goditjet e tjera në vend, dhe gjithashtu kishin frikë nga situata ekonomike e Rusisë pasi kaq shumë vende zbatuan sanksione për pushtimin.
Putin tha në një fjalim të mërkurën se Rusia duhet t’i nënshtrohet një “vetëpastrimi të shoqërisë” pas pushtimit të Ukrainës. Ai u shpreh: “Perëndimi kolektiv po përpiqet të copëtojë shoqërinë tonë, duke spekuluar mbi humbjet ushtarake, mbi efektet socio-ekonomike të sanksioneve, në mënyrë që të provokojë një rebelim popullor në Rusi.”
Ai u shfaq duke kërcënuar njerëzit që nuk ishin përkrahës të qeverisë: “Por çdo popull, veçanërisht populli rus, është në gjendje të dallojë patriotët e vërtetë nga bastardët dhe tradhtarët dhe do t’i pështyjë”. “Jam i sigurt se ky vetëpastrim i domosdoshëm dhe i natyrshëm i shoqërisë vetëm sa do të forcojë vendin tonë, solidaritetin, bashkimin dhe gatishmërinë tonë për t’iu përgjigjur çdo thirrjeje për veprim”, vazhdoi ai.
Në fjalimin, Putin dukej se kishte në mendje rusët e pasur, properëndimorë, duke theksuar ata me prona në Francë ose SHBA, të cilët janë mësuar të hanë goca deti dhe mëlçi pate (foie gras). BusinessInsider
Edel Strazimiri / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.