Rusia jashtë sportit për 4 vite! Ka ndërhyrë tek të dhënat e dopingut
Rusia u përjashtua nga lojërat olimpike dhe kampionate të tjera të mëdha botërore këtë javë, pasi autoritetet ndëshkuan vendin për ndërhyrjen tek të dhënat laboratorike të dopingut.
Vendimi i Agjencisë Botërore Kundër Dopingut (WADA) ndalon Rusinë që të marrë pjesë në shumë kampionate të rëndësishme për 4 vite, periudhë që mbulon lojërat Olimpike të vitit 2020 në Tokjo, lojërat dimërore Olimpike të vitit 2022 në Pekin si dhe kupën botërore të vitit 2022.
Komisioni ekzekutiv i agjencisë (WADA) e mori vendimin pasi vlerësoi se Moska ka ndërhyrë tek të dhënat laboratorike, duke vendosur prova të falsifikuara dhe fshirë dosje të lidhura me testime pozitive të dopingut, ç’ka do të ndihmonte në identifikimin e përdoruesve të drogës.
Vendimi për të ndëshkuar Rusinë ishte unanim, sipas agjencisë. Rusia, që është përpjekur të shfaqet si një superfuqi botërore e sportit, është përfshirë në disa skandale të dopingut që prej vitit 2015, ku një raport i Agjencisë Botërore Kundër Dopingut (WADA) zbuloi prova të përdorimit në masë të drogës tek atletët rusë.
Sanksionet e kësaj jave, që ndalojë gjithashtu për 4 vite Rusinë që të mirëpres evente sportive, u rekomanduan nga komisioni i Agjencisë kundër dopingut, që erdhi pas dorëzimit të të dhënave laboratorike nga Moska më herët gjatë vitit.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.