Rusia largon dyshimet për mospagimin e borxhit – Investitorët presin pagesa më komplekse në ditët në vijim

Rusia ka paguar interesat ndaj 2 obligacioneve sovrane në dollar, duke larguar dyshimet mbi gatishmërinë dhe aftësinë e vendit për të respektuar detyrimet e jashtme, pas sanksioneve të ashpra nga Perëndimi. Megjithatë, afatet e disa pagesave në vijim, do të mbajnë investitorët në tension.

Dështimi për të paguar do të ishte i pari për Rusinë për një obligacion të jashtëm në mbi 1 shekull dhe transaksionet e fundit janë parë si një provë e rëndësishme pas sanksioneve ndëshkuese ndaj Moskës, për luftën në Ukrainë.

Një ditë më parë, Ministria e Financave në Rusi, theksoi se ka respektuar plotësisht detyrimet.  Burimet e përfshira në procesin prej disa hapash të pagesave të kuponit prej 117 mln dollarë, konfirmuan gjithashtu se fondet janë rrugës drejt kreditorëve.

Disa mbajtës të olbligacioneve në Europë theksuan se kanë marrë fondet në dollarë.
Kuponat kishin për afat ditën e Mërkurë, por Rusia kishte një periudhë 30-ditore të faljes për pagesat, që duhet të respektohen plotësisht dhe në valutën e duhur, që të mos quhet si dështim.

Lajmi i pagesave rriti çmimet e titujve rus të borxhit në bursë, përfshirë të  obligacionit me afat 2043 (78307ADH3=),  ndaj të cilit u pagua një kupon.

Rusia ka rreth 40 miliardë dollarë tituj të huaj të papaguar ende, ku gjysma mbahen nga investitorë të huaj.  Nuk është ende e qartë nëse mbajtësit vendas të obligacioneve, që përfshijnë disa prej huadhënësve më të mëdhenj rusë, kanë marrë pagesa.

Megjithatë, transaksionet e kësaj jave janë të parat ndër disa që Rusia duhet të bëjë, për të respektuar rrjetin kompleks të huamarrjes së jashtme.

Vendi duhet të paguajë 615 mln dollarë të tjera në kupon këtë muaj, ndërsa më 4 Prill, një obligacon prej 2 miliardë dollarë(78307ADC4=), duhet të ripaguhet .  Në total, mbi 4.5 miliardë dollarë në kupona dhe maturitete kanë afat deri në fund të vitit.

Një prej ndërlikimeve është se Eurobondet e emetuara pas 2014, vitin kur Rusia u sanksionua prej aneksimit të Krimesë, lejojnë pagesat që të ndërmerren në valuta alternative si euro dhe paund.

Kuponi i ardhshëm ndërkombëtar me afat 21 Mars, është një pagesë prej 66 mln dollarë  ndaj një obligacioni me afat-maturimi në vitin 2029, që ashtu si titujt e tjerë të shitur pas 2018-s, listojnë rublën si një opsion alternativ të valutës.

Klevis Llaha / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.