Rusia, një strategji tjetër për ekonominë – Nabiullina: Duhet të rregullojmë strukturën industriale duke kaluar në tregun e brendshëm

Rusia do të ndërmarrë hapa për të rregulluar politikën e saj ekonomike duke rritur ristrukturimin industrial për të shmangur efektet nga sanksionet perëndimore, deklaroi kreu i bankës qendrore të vendit. Duke folur në Forumin e 25-të Ekonomik Ndërkombëtar të Shën Petersburgut (SPIEF), guvernatorja e Bankës Qendrore, Elvira Nabiullina, tha se Rusia është në gjendje të rigjallërojë ekonominë e saj dhe nuk do të mbyllet nga sanksionet perëndimore.

Që nga shpërthimi i konfliktit në Ukrainë, Rusia ka vuajtur disa raunde sanksionesh ekonomike nga Perëndimi. Gjatë forumit, shumë politikanë rusë ranë dakord se Rusia duhet së pari të stabilizojë kursin e këmbimit të rublës dhe të kontrollojë inflacionin me politikat e saj aktuale ekonomike. Ndërkohë, për të përballuar sanksionet, vendi  duhet të rregullojë strukturën dhe drejtimin industrial në një shkallë të gjerë dhe të marrë një qasje më fleksibël për të ruajtur vitalitetin ekonomik.

“Rusia ka fituar shumë të ardhura në valutë të huaj nga eksportet. Por, nëse ka vetëm eksporte dhe jo importe, Rusia do të detyrohet t’i drejtojë paratë në investime të prirura ndaj rrezikut. Prandaj, duhet të rregullojmë strukturën industriale duke kaluar në tregun e brendshëm, mbështetur prodhimin dhe rigjallëruar industrinë e prodhimit”, tha Nabiullina.

Ajo theksoi se ekonomia ruse aktualisht po ecën pa probleme dhe kontrolli i kursit të  këmbimit valutor do të lehtësohet gradualisht në vijim.

Gjatë forumit ekonomik, shumë sipërmarrës rusë dhe zyrtarë të qeverisjes vendore thanë se fokusi i tyre në të ardhmen e afërt është t’i jepet fund plotësisht varësisë ekonomike nga Perëndimi dhe të kërkojnë në mënyrë aktive tregje alternative të tregtisë së jashtme në vendet e tjera në zhvillim.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.