Rusia paguan ende për Krimenë – Kostot rriten çdo vit. Banorët ndiejnë rënien e të ardhurave
Rusia vazhdon të ndiejë kostot e aneksimit tëKrimesë, pavarësisht se ka kaluar gjysmë dekade që kur presidenti Vladimir Putin lajmëroi vendimin. Traktati i anëtarësimit i nënshkruar për të sjellë territorin në Detin e Zi në kontroll të Moskës, nuk njihet ende nga shumë vende dhe SHBA e Bashkimi Europian, janë përpjekur të ndëshkojnë Rusinë me sanksione. Megjithatë, Rusia ka vazhduar të integrojë Krimenë në ekonomi, duke investuar miliarda dollarë në impante energjitike dhe duke ndërtuar një urë gjigante drejt gadishullit vitin e kaluar. Shumica e kostove për Rusinë kanë ardhur nga sanksionet europiane dhe amerikane, që janë shtuar çdo vit pas aneksimit dhe të tjera pritet të shtohen për dyshimet se Moska ka ndërhyrë në zgjedhjet në SHBA.
Edhe banorët e vendit po ndiejnë ndikimin nga rënia e investimeve të huaja dhe të ardhurat. Sipas një sondazhi, qasja e publikut për aneksimin ka nisur të dobësohet. Agjencia mediatike Bloomberg ka vlerësuar se sanksionet i kanë hequr ekonomisë ruse rreth 6% në 5 vitet e fundit. Një pjesë e madhe e tkurrjes vjen nga rënia e çmimeve të naftës, por pjesa tjetër fajësohet se ka ardhur nga sanksionet. Kjo barrierë nuk ka gjasa të largohet së shpejti dhe akuzat se Rusia ka ndërhyrë në zgjedhjet presidenciale në SHBA, e përkeqësojnë situatën. Kompanitë dhe individët rusë subjekt të sanksioneve amerikane janë katërfishuar në numër, duke prekur 700, që prej vitit 2014.
Kjo barrierë ekonomike ka sjellë më pak para në formën e pagave për banorët rusë. Të ardhurat mesatare mezi kanë kaluar 459 dollarë në muaj që prej aneksimit të Krimesë, dhe rënia e çmimeve të naftës solli një recesion gati 2-vjeçar. Ndërkohë që presionet ekonomike nga aneksimi i Krimesë janë shtuar, publiku ka filluar të ndryshojë qasje mbi këtë. Sipas një sondazhi të publikuar nga Fondacioni i Opinionit Publik në Moskë, vetëm 39% e rusëve mendojnë se aneksimi i Krimesë ka pasur efekt pozitivë për Rusinë.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.