Rusia përballet me “ikjen e trurit” – Ekonomisti rus: ‘Rreth 200,000 qytetarë janë larguar nga vendi që nga fillimi i luftës’
Jashtë parlamentit të Gjeorgjisë, Yevgeny Lyamin ngre kuti me rroba dhe pako ushqimore në një kamion pritës për në Ukrainë.
Ai është një nga më shumë se 25,000 rusët që kanë mbërritur në Gjeorgji që nga pushtimi rus i Ukrainës. Rusët kanë luftuar për të gjetur strehim të përballueshëm në të gjitha qytetet kryesore. Shumë mund të shihen teksa enden nëpër kryeqytet, Tbilisi, me valixhet e tyre dhe shpesh edhe kafshët e tyre shtëpiake.
Eksodi nuk ndalet në Gjeorgji. BE, SHBA, Britania e Madhe dhe Kanadaja kanë mbyllur hapësirën e tyre ajrore për fluturimet ruse, kështu që ata po shkojnë drejt vendeve ku fluturimet janë ende të lejuara dhe ku nuk kërkohen viza, si Turqia, Azia Qendrore dhe Kaukazi i Jugut. Shumë prej tyre kanë ikur në Armeni.
Sipas një vlerësimi nga një ekonomist rus, rreth 200,000 rusë janë larguar nga vendi i tyre që nga fillimi i luftës.
Bjellorusët janë gjithashtu në lëvizje, duke i shpëtuar represionit dhe sanksioneve perëndimore të vendosura ndaj qeverisë së liderit autoritar Alexander Lukashenko për bashkëpunim me Vladimir Putinin e Rusisë.
Kjo ka bërë që çmimet të rriten në fluturimet e minutës së fundit dhe akomodimet me qira në qytetet kryesore pritëse, si Stambolli dhe kryeqyteti i Armenisë, Jerevani.
Për ta momenti i vendimit erdhi me një ligj të ri “tradhtie shtetërore” që ka hyrë në fuqi në Rusi. Kushdo që shpreh mbështetje për Ukrainën mund të përballet me dënime me burg deri në 20 vjet dhenë qytetarët rus.
Shumë nga emigrantët e rinj janë profesionistë të industrisë së teknologjisë që mund të punojnë nga distanca. Një zhvillues i videolojërave tha se ai dhe shumica e njerëzve që ai njihte nuk ishin dakord me politikën ruse dhe ata e dinin tani se çdo protestë do të shtypej me dhunë.
Ka pasur raporte të shumta për hostët e Airbnb që refuzojnë t’ua lënë pronat e tyre qytetarëve rusë dhe bjellorusë.
Në sallën e shërbimit publik të Tbilisit, të sapoardhurit po regjistrojnë biznese ose po aplikojnë për qëndrim.
Dy specialistë të IT-së nga kryeqyteti i Bjellorusisë Minsk, janë regjistruar si sipërmarrës të vetëm. Kjo do t’i lejojë ata të hapin llogari bankare gjeorgjiane.
Që nga fillimi i luftës, Tbilisi ka parë disa nga mitingjet më të mëdha në mbështetje të Ukrainës. Një studim i fundit zbuloi se 87% e gjeorgjianëve e shohin luftën në Ukrainë si luftën e tyre me Rusinë.
Por shumë gjeorgjianë janë të shqetësuar për këtë fluks dramatik të rusëve, pasi kanë kaluar më pak se 14 vjet që kur lideri rus pushtoi Gjeorgjinë.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.