Rusia po lejon importet e paautorizuara nga Perëndimi si reagim ndaj sanksioneve të ashpra!

Rusia po lejon importet pa lejen e pronarit të markës tregtare, si reagim ndaj sanksioneve që kanë ndalur një sërë produktesh perëndimore. Kryeministri Mikhail Mishustin miratoi “importet paralele” si pjesë e një pakete të katërt të mbështetjes për bizneset e vogla dhe të mesme. Përgjigja e Perëndimit ndaj luftës së Rusisë ka nxitur një rritje të inflacionit.

Kryeministri tha se deri më tani mallrat nuk mund të shiteshin në Rusi pa autorizimin e pronarit të markës tregtare. Qëllimi i lejimit të shitësve me pakicë të importonin produkte pa lejen e kompanive, shpjegoi ai, ishte të ngopte tregun në mënyrë që njerëzit të kishin akses të shpejtë në mallrat e nevojshme, duke garantuar furnizimin pavarësisht “veprimeve jomiqësore të politikanëve të huaj”.

Listat e produkteve do të bashkërendoheshin me ministrinë e industrisë dhe tregtisë, tha Mishustin në një fjalim televiziv. Raportet ruse tregojnë se ata do të fokusohen në produktet e konsumit ku çmimet janë rritur. Inflacioni vjetor është rritur këtë javë në 15.66%. Sheqeri në veçanti është goditur nga rritja e çmimeve dhe mungesat dhe shërbimi antimonopol i Rusisë tha se po hetonte pesë prodhuesit më të mëdhenj të vendit.

Qindra marka globale si Apple dhe H&M janë tërhequr gjithashtu nga tregu rus ose kanë ndaluar shitjet që nga fillimi i pushtimit të Ukrainës më 24 shkurt. Disa kompani kanë vazhduar të ofrojnë artikuj bazë ushqimore dhe higjienike. Dyqani i sporteve Decathlon tha këtë javë se po mbyllte dyqanet e tij vetëm për shkak të problemeve të zinxhirit të furnizimit, ndërsa Nestle ka pezulluar shitjen e “shumicës dërrmuese të vëllimit dhe shitjeve” në Rusi.

Në një zhvillim të veçantë, institucionet shtetërore ruse janë ndaluar të blejnë softuer të huaj nga e enjtja për të ashtuquajturën infrastrukturë kritike të informacionit, pa pëlqimin paraprak të qeverisë. Dekreti mbulon sistemet e telekomit dhe informacionit të përdorur nga agjencitë qeveritare, si dhe kompanitë në mbrojtje, kujdes shëndetësor, transport, energji dhe financa. BBC

Edel Strazimiri / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.