Ryanair: “Distancimi shoqëror nëpër aeroplanë është ‘propozim idiot’ – Nuk fluturojmë nëse s’na paguan qeveria”

Drejtori i Përgjithshëm i Ryanair, një nga linjat ajrore më të mëdha në botë, tha që aeroplanët e tij nuk do të fluturonin nëse linja ajrore do të duhej ta mbante vendin e mesëm bosh për t’u pajtuar me atë që ai e përshkroi si një propozim ‘idiot’ për distancimin shoqëror gjatë pandemisë koronavirus.

Michael O’Leary i tha Financial Times se një veprim i tillë do të ishte “plotësisht joefektiv”

O’Leary tha se planet e linjës ajrore irlandeze për të filluar fluturimin do të shkatërroheshin nga “disa masa plotësisht të paefektshme për distancimin shoqëror,  sepse nëse vendet e mesme janë bosh, ne nuk do kthehemi fare në fluturim.”

Ai tha se linja ajrore i kishte thënë qeverisë irlandeze se nëse përpiqet të imponojë një rregull të tillë, atëherë “ose qeveria paguan për vendin e mesëm ose ne nuk do të fluturojmë”.

O’Leary tha gjithashtu se linja ajrore nuk mund të fitonte duke pasur kaq pak njerëz në aeroplan dhe se lënia e vendeve të lira në mes, gjithsesi nuk do t’i linte njerëzit aq larg sa të krijonin distancimin efektiv shoqëror.

D.B – SCAN
Burimi: Business Insider

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.