Ryanair “mposht” grevat – Pasagjerët rriten me 9% në Gusht, Wizzair nuk mbetet pas
Linja ajrore low-cost më e madhe në Europë, Ryanair, ka shtuar numrin e pasagjerëve me 9% në muajin Gusht krahasuar të njejtën periudhë një vit më parë, ndërkohë që blerja e kompanisë austriake Laudamotion, ka kompensuar për grevat dhe mungesën e stafit.
Ryanair arriti në dakordësi me pilotët irlandezë në fund të muajit të kaluar, pasi grevat dhe mungesat në staf sollën anulimin e 550 fluturimeve në Gusht. Kompania irlandeze pati ditën më të keqe të protestave në fillim të Gushtit, ndërkohë që protestat e pilotëve në 5 shtete europiane, ndërprenë planet e 55,000 klientëve në kulmin e sezonit të Verës.
Linja ajrore është ende në negociata me sindikata të tjera tregtare, ndërkohë që pilotët holandezë thonë se marrëveshja në Irlandë nuk mbulon të gjitha çështjet e konfliktit.
Të dhëna të tjera për trafikun e linjës me buxhet, Wizzair, që konkurron me Ryanair në Europën Lindore, treguan një rritje me 20% me bazë vjetore të pasagjerëve.
Trafiku total i Ryanair u rrit në 13.8 milionë pasagjerë, përfshirë rreth gjysmë milionë nga blerja e linjës austriake Laudamotion, blerje që u miratua nga rregullatorët europianë në Korrik.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.