Ryanair paralajmëron rivalët – “Nuk do t’i mbijetojnë dot rritjes së çmimeve të naftës gjatë Dimrit”
Kreu ekzekutiv i linjës low-cost, Ryanair, pret që disa nga rivalët europianë të falimentojnë në muajt që vijnë. Linja ajrore irlandeze paralajmëroi se rritja e çmimeve të naftës, me shumë mundësi do të bëjë që disa kompani rajonale të fluturimeve të falimentojnë në fillim të 2019-ës. Rritja e ndjeshme e çmimeve në 12 muajt e fundit ka rënduar industrinë, ndërkohë që linjat e mëdha ajrore po detyrohen të përshtaten në një treg më konkurrues.
“Nafta në 80 dollarë për fuçi do të shkaktojë probleme në Europë gjatë Dimrit”, tha kreu ekzekutiv i Ryanair, Michael O’Leary. Ai shton se disa linja nuk kanë rezultuar dot me fitim kur nafta ishte në 40 dollarë për fuçi gjatë vitit të kaluar. Ditën e Hënë, nafta bruto amerikane kuotohej në 71.8 dollarë për fuçi ndërsa ajo e Londrës në 79.16. Ndërkohë, linja ajrore irlandeze ka publikuar edhe rezultatin për tremujorin, me të ardhurat neto që prekën nivel rekord.
Linja më e madhe low-cost në Europë publikoi një fitim prej 1.45 miliardë euro në vitin financiar që përfundoi më 31 Mars, në rritje me 10%me bazë vjetore, duke thyer projeksionet e analistëve. Megjithatë, Ryanair paralajmëroi se të ardhurat me shumë gjasa do të bien në vitin që vjen dhe projekton një fitim pas taksave në 1.25 miliardë euro, poshtë vlerësimeve të analistëve. Këto projeksione bëjnë kontrast të fortë me linjën e dytë më të madhe low-cost në Europë, EasyJet, që bëri të ditur më herët gjatë javës se pret një rritje të fitimit me më shumë se 30% këtë vit.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.