Sa afër do jetë Britania me BE? Barnier: ”Një marrëdhënie e fortë. Më shumë kohë për negociata”
Marrëveshja për të ardhmen e Britanisë dhe Bashkimit Europian do të kërkojë më shumë se periudha e tranzicionit prej 11 muajsh që nis në fund të Janarit, sipas shefit të negociatave në Bruksel, Michel Barnier. Britania pritet të dalë nga Bashkimi Europian më 31 Janar dhe të dyja palët do të kenë kohë deri në fund të vitit që të negociojnë një marrëdhënie të re tregtare.
Kryeministri i Britanisë, Boris Johnson tha se synon të zgjasë periudhën e tranzicionit përtej Dhjetorit. “Jemi gati për të bërë maksimumin në 11 muaj për të arritur një marrëveshje me Mbretërinë e Bashkuar, por do na duhet më shumë kohë”, tha Barnier.
Ai tha se duke marrë parasysh afatin tejet të shkurtër, Bashkimi Europian do të duhet të vendosë prioritete në muajt e ardhshëm. Fillimisht do të jetë ndërtimi i një mekanizmi të ri për të bashkëpunuar me Britaninë në formë bilaterale apo nëpërmjet institucioneve botërore, për të trajtuar çështje si ndryshimi klimatik dhe paqja në Lindjen e Mesme.
“Pika e dytë është ndërtimi i një marrëdhënieje tejet të afërt në lidhje me sigurinë”, tha Barnier. Së fundmi, ai shtoi se Bashkimi Europian do të kërkojë një partneritet ekonomik të ardhshëm të bazuar në konkurrencë për kushte si mjedisi, taksat dhe çështjet sociale.
Johnson ka thënë se Londra nuk po kërkon një marrëdhënie të re të bazuar në respektimin e rregullave ekzistuese.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.