Sa aktivë janë adoleshentët shqiptarë? – Studimi: Të 6-tët në botë për normën më të lartë të atyre që bëjnë akvitetit fizik

Revista mjekësore më prestigjioze në botë, “The Lancet”, dhe Organizata Botërore e Shëndetësisë (OBSH) kanë publikuar një studim për  pamjaftueshmërinë e aktivitetit fizik te adoleshentët, me të dhëna nga 146 shtete të botës. Shqipëria është një ndër to, dhe rezulton se ¾ adoleshentë shqiptarë nuk bëjnë mjaftueshëm aktivitet fizik.

Për vendin tonë norma fiksohet në 73.9%, thonë të dhënat e studimit të publikuar të Premten. Studimi quan si të pamjaftueshëm çdo  aktivitet fizik i cili nuk i kalon 60 minutat në ditë, të paktën 5 herë në javë. Adoleshentët e marrë në analizë janë të moshës 11-17 vjeç. Ndërkohë, mes femrave dhe meshkujve ka një diferencë të ndjeshme. Për meshkujt, norma fiksohet në 67.6%, ndërsa për femrat në 80.6%.

Të dhënat tregojnë gjithashtu se, në këtë drejtim ka një përmirësim të lehtë krahasuar me vitin 2001. Pavarësisht faktit se ¾ e adoleshentëve shqiptarë nuk bëjnë mjaftueshëm aktivitet fizik, ata rezultojnë ndër më shembullorët në Europë e botë. Mesatarja e rajonit të Europës qendrore dhe lindore fiksohet në 80.9%, ndërkohë që vetëm dy shtete perforomojnë më mirë se ne në rajon. Në nivel global ndërkohë, shtetet që regjistrojnë një rezultat më të mirë janë vetëm 6: Bullgaria, Sllovakia, Irlanda, Bangladeshi dhe Shtetet e Bashkuara të Amerikës. Sipas Organizatës Botërore të Shëndetësisë përfitimet që burojnë nga aktiviteti fizik në adoleshencë janë të panumërta.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.