Sa do të kushtojë “hard Brexit”? FMN: Do të sjellë humbje për BE sa 1.5% e PBB-së
Vendet e Bashkimit Europian do të pësojnë një goditje në ekonomi që do të jetë ekuivalente me 1.5% të prodhimit vjetor, nëse Britania del pa arritur një marrëveshje të tregtisë së lirë, sipas Fondit Monetar Ndërkombëtar.
Britania pritet të dalë në 29 Mars të vitit të ardhshëm dhe Kryeministrja Theresa May nuk ka arritur ende në një konsensus me Partinë Konservatore për marrëdhënien që do të ketë me bllokun.
Humbja e prodhimit ekonomik në BE në rastin e mos arritjes së një marrëveshjeje, do të arrijë në rreth 250 miliardë dollarë, bazuar në vlerësimet e FMN mbi përmasën e ekonomisë së BE përjashtuar Britaninë këtë vit.
Humbja në punësim do të arrijë në një total prej 0.7% të fuqisë punëtore në BE, apo në më shumë se 1 milionë vende pune. Koha e këtyre humbjeve do të varet nga kohëzgjatja e marrëveshjeve tranzitore pas Brexit, por me shumë gjasa do të duhen 5-10 vite që të ndihen plotësisht.
Ndërkohë që Britania dhe Bashkimi Europian kanë rënë dakord për një plan të tranzicionit në Mars që të ruajë status quo-n deri në fund të 2020-ës, kjo marrëveshje nuk është ratifikuar ende dhe rrezikon që të prishet nëse arrihet një dakordësi mbi objektivat afat-gjatë.
Irlanda do të pësojë goditjen më të madhe për shkak të lidhjeve të forta tregtare me Britaninë, ndjekur nga Holanda, Belgjika dhe Luksemburgu. Gjermania do të ketë dëme gjithashtu për shkak të zinxhirëve industralë të furnizimit.
Duke parë vetëm ndikimin tregtar, Irlanda mund të humbasë rreth 4% të prodhimit. Britania ka argumentuar se është në interes të Bashkimit Europian që të ketë një qasje fleksibël ndaj Brexit.
Shumë politikanë britanikë kanë thënë se vendi duhet të dalë nga BE dhe të tregtojë sipas rregullave të Organizatës Botërore të Tregtisë, që është skenari i FMN, nëse Europa bën shumë pak lehtësime.
Dëmi ekonomik nga Brexit do të jetë minimal nëse Britania adapton një “soft Brexit” të stilit norvegjez, duke qenë pjesëmarrës në Zonën Ekonomike Europiane, gjë të cilën May e ka refuzuar pasi do të kërkonte respektimin e rregullave të BE.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.