Sa do të paguhet për paratë e fshehura? – Norma e tatimit 5-10 për qind, përfiton më shumë kush deklaron më shpejt

Ministria e Financave ka përcaktuar se sa duhet të paguajnë individët dhe subjektet për formalizmin e parave të padeklaruara. Sipas nenit 12 të draftit për “amnistinë fiskale dhe penale të subjekteve që bëjnë deklarim vullnetar të pasurive”,  norma e tatimit nis nga 5 për qind deri në 10 për qind. Konkretisht, në rastet e deklarimit vullnetar të shumave në të holla dhe të depozitimit të tyre në llogaritë bankare, banka mban një tatim të posaçëm prej 5 për qind të shumës totale të deklaruar për deklarime dhe pagesa të kryera në katër muajt e parë nga hyrja në fuqi e ligjit; 7 për qind të shumës totale të deklaruar për deklarime dhe pagesa të kryera në katër muajt e dytë nga hyrja në fuqi e ligjit; 10 për qind të shumës totale të deklaruar për deklarime dhe pagesa të kryera në katër muajt e tretë nga hyrja në fuqi e ligjit.

Projektligji përcakton se në rastet e deklarimit vullnetar të pasurive të tjera të deklaruara vullnetarisht pranë njësisë special, tatimi i posaçëm paguhet si vijon: 5 për qind të vlerës së deklaruar për deklarime dhe pagesa të kryera në katër muajt e parë nga hyrja në fuqi e ligjit; 7 për qind të vlerës së deklaruar për deklarime dhe pagesa të kryera në katër muajt e dytë nga hyrja në fuqi e ligjit; 10 për qind të vlerës së deklaruar për deklarime dhe pagesa të kryera në katër muajt e tretë nga hyrja në fuqi e ligjit. Bankat tregtare apo institucionet financiare transferojnë të ardhurat nga pagesat e tatimit të posaçëm në kuadër të këtij ligji, në llogarinë e posaçme të thesarit të ministrisë përgjegjëse për financat.

Detyrimet tatimore të subjekteve përfitues, në lidhje me vlerën dhe llojin e pasurisë së deklaruar, konsiderohen të paguara rregullisht dhe autoritetet kompetente tatimore nuk mund të kërkojnë pagesën e detyrimeve të tjera shtesë ndaj atyre të paguara. Të njëjtat norma tatimore do të aplikohen edhe për formalizimin e parave të emigrantëve, të cilët duhet të plotësojnë formularin për deklarimin vullnetar të pasurive, dhe ta paraqesin atë në autoritetet përgjegjëse doganore kufitare për kryerjen e procedurave doganore.

Elisabeta Dosku / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.