Sa harxhojnë shqiptarët për pushime? Greqia dhe Italia, destinacionet e preferuara

Me zhvillimin e turizmit në vend, ku gjithmonë e më shumë të huaj po zgjedhin Shqipërinë si destinacionin e tyre të pushimeve, është rritur paralelisht edhe turizmi dalës. Vitin e kaluar u regjistruan mbi 5.1 milionë dalje të shtetasve shqiptarë.

Muaji Gusht është edhe periudha e preferuar e shqiptarëve për të udhëtuar, me gati 700 mijë individë që kanë kaluar kufijtë, ndjekur nga Korriku dhe Shtatori me nga 500 mijë udhëtarë.

Destinacionet më të preferuara për vizita të gjata janë Greqia dhe Italia, ku janë kryer përkatësisht 28% dhe 20% e udhëtimeve. Edhe vendet fqinje të rajonit paraqesin një interes për vizita më të shkurtra, ku 16% e lëvizjeve janë në drejtim të Kosovës, ndjekur nga Maqedonia me 13% dhe Mali i Zi me 6%.

Lista e destinacioneve të preferuara për pushime jashtë vendit mbyllet nga Gjermania me 3% të udhëtimeve totale.

Në përgjithësi, shqiptarët duke se janë të kursyer në shpenzime jashtë vendit, duke harxhuar mesatarisht 46 euro në ditë për person, përfshirë këtu akomodimin dhe ngrënien. Madje shpenzimet totale të shqiptarëve jashtë vendit janë të përafërta me ato të kryera në vitin 2014, kur udhëtuan jashtë vendit 1 milion shtetas më pak.

Vlera prej 46 eurosh në ditë shpenzuar kryesisht në shtete të Bashkimit Europian duket edhe më e ulët nëse e krahasojmë me faktin që një turist nga Kosova apo Maqedonia shpenzojnë në vendin tonë mesatarisht 55 euro në ditë.

Cilët janë turistët më me leverdi për shqiptarët? Ja sa shpenzojnë ata mesatarisht për pushime

Kursimi vihet re edhe tek mënyra e akomodimit, ku vetëm 59% zgjedhin të flenë në hotel. Gati 1 në 3 shqiptarë, (28%), gjatë udhëtimit jashtë vendit fle pranë familjarëve apo miqve që jetojnë në vendin ku ai po viziton.

Mes pushuesve shqiptarë vihet re edhe një trend për rezervimin e shtëpive me qira, diçka që po bëhet gjithmonë e më masive përmes platformave online dhe aplikacioneve si AirBNB apo Booking.

Sa i takon mënyrës së transportit, 58% e udhëtimeve bëhen me automjetet personale, ndjekur nga 17% të udhëtimeve me autobus dhe 13% me traget. Ndërkohë, transporti ajror zë vetëm 12% të totalit, por pritet që në vijim të zërë një rol gjithmonë e më të madh.

Angelo Haruni/SCAN

Cilat janë pikat kufitare me fluksin më të madh në Shqipëri? Ja sa të huaj pritën në 2017

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.