Sa mund të zgjasin lëkundjet? Flet për SCAN sizmiologu Dushi: Jo panik! Janë pasgoditje, jo aktivizim tërmeti tjetër
Sizmiologët bëjnë apel për të mos krijuar panik duke përsëritur se tërmetet nuk mund të parashikohen. Duke folur në emisionin “Përtëfol” në SCAN me gazetaren Dafina Hysa, sizmiologu Edmond Dushi tha se është krejtësisht normale që pas tërmetit të dy ditëve më parë të ketë edhe një sekuencë tërmetesh të tjera, por që në këtë rast janë pasgoditje.
“Është krejt normale që pas një tërmeti të tillë 7-8 ballë në zonën e tij qendrorë të ketë një sekuencë tërmetesh të tjerë që i klasifikojmë si pasgoditje. Janë mikrotermete, që shpeshherë kalojnë pragun e ndjeshmërisë që na duket sikur përsëri u aktivizua një tërmet tjetër por në fakt është një relaksim, qetësim, i zonës aktive duke ia transferuar forcimin e akumuluar zonave përreth. Pra do të vazhdojë një aktivitet i tillë deri në qetësimin e plotë të zonës” u shpreh Dushi.
Po sa mund të zgjasin këto lëkundje?
Sipas sizmiologut as kjo nuk mund të parashikohet megjithatë aktiviteti sizmik mund të vazhdojë me javë e me muaj, por që lëkundjet mund të mos ndjehen më nga qytetarët por regjistrohen vetëm nga stacionet sizmologjike, pa sjellë pasoja.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.