Sa na dëmton “lufta” tregtare? $3 milionë eksporte drejt SHBA nën kërcënim nga tarifat e reja doganore

Tarifat e reja të produkteve të importit të propozuara nga administrata Trump që po shkaktojnë një luftë deklaratash në çdo cep të globit, duket se do të dëmtojnë edhe Shqipërinë. Vendi ynë ka një bilanc tregtar negativ me Shtetet e Bashkuara të Amerikës, por sërish, volumi i eksporteve nuk është i papërfillshëm.

Në vitin 2017, Shqipëria eksportoi mallra në vlerën e 3.4 miliardë lekëve, çka përkthehet në rreth $32 milionë.  Trump ka premtuar një taksë prej 25% mbi çelikun e importuar nga jashtë dhe një tarifë prej 10% mbi aluminin.

Ndërkohë, grupmallrat që përbëjnë vlerën më të madhe të eksporteve shqiptare drejt Shteteve të Bashkuara të Amerikës janë pikërisht metalet dhe materialet e ndërtimit. Kjo kategori vlente $20 milionë në 2017.

Të dhënat e Janarit të këtij viti flasin gjithashtu për një trefishim të eksporteve drejt shteteve të bashkuara. Pra, vendosja e tarifave doganore nga ana e administratës amerikane mbi këto mallra, përkthehet në një goditje të madhe për këta lloj eksportuesish.

Kjo gjë do të kufizonte, për të  mos thënë eliminuar fare kërkesën nga jashtë. Sipas të dhënave të detajuara nga drejtoria e përgjithshme e doganave, Shqipëria ka eksportuar alumin në vlerën e 313 milionë lekëve gjatë 2017-ës, çka përkthehet në rreth $3 milionë, dhe që nuk është një shifër e papërfillshme për ekonominë  shqiptare. Sa i përket çelikut ndërkohë eksportet janë thuajse të papërfillshëm, pasi vlejnë vetëm 32 mijë dollarë në vit.

Roel Korkuti/SCAN 

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.