Sa para do të marrin fermerët? – Kompensimi direkt për bagëtitë e imta, bletarinë dhe qumështin

Ministria e Bujqësisë ka përcaktuar saktësisht se si do të ndahet fondi prej 5 milionë eurosh në ndihmë të fermerëve që do të aplikojnë për subvencione. Përmes një udhëzimi të publikuar në Fletoren Zyrtare, specifikohet se për  tufën  bazë  të  matrikulluar,  për  fermat  me  jo  më  pak se  100  krerë  dele ose dhi, subvencionohen me vlerën 1000 lekë/krerë, dorëzimi i qumështit lëndë e parë, në vlerën 10 lekë për litër në pikat e përpunimit, për fermat që mbarështojnë lope ose të imëta, kundrejt faturës tatimore të shitjes, por jo më shumë se 700 mijë lekë për subjekt.

Mbarështim i  bletarisë me 1 mijë lekë për zgjua, për ferma me jo më pak se 50 zgjoje, por masa e financimit të jetë jo më shumë se 150 mijë lekë për subjekt. Mbështetje  ndaj  anijeve  të  peshkimit  me  flamur  shqiptar,  në  vlerën  20 lekë/kg për açuge ose sardele të peshkuara. Pagesa do të kryhet kundrejt sasive të tregtuara në stabilimentet shqiptare vetëm për qëllime përpunimi të  këtyre produkteve, të vërtetuara me fatura tatimore dhe certifikatë zënieje.

Mbjellje e ullinjve në vlerën 350 mijë lekë/ha, për format intensive të  kultivimit, dhe në vlerën 250 mijë lekë/ha, për format tradicionale. Kur kultivari është autokton, masa e financimit shtohet me 50 mijë lekë/ha. Sipërfaqja e mbjellë me ullinj për fermerët individualë të jetë jo më pak se 0.2 ha, për grup fermerësh jo më pak se 1 ha, në një bllok të vetëm, për Shoqëritë e Bashkëpunimit Bujqësor (SHBB) jo më pak se 3 ha. Aplikimet janë hapur një javë më parë, dhe kriter kryesor është që fermeri të ketë një NIPT aktiv.

Elisabeta Dosku/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.