Sa para’ morën bashkitë gjatë këtij viti? – 27.1 miliardë lekë në total, bashkitë e mëdha përfituan më shumë fonde
61 bashkitë në vend kanë përfituar 27.1 miliardë lekë gjatë këtij viti përmes transfertës së pakushtëzuar, ku 500 milionë lekë prej të cilave i morën së fundmi me qëllim shlyerjen e detyrimeve të prapambetura. Por cila nga bashkitë ka përfituar më shumë fonde? Transfreta e pakushtëzuar ndahet përmes një formule të caktuar, ku merren parasysh një sërë kriteresh si numri i popullsisë, sipërfaqa, personeli mësimor, konviktet, ujitja dhe kullimi etj.
Ndërsa fondi për shlyerjen e detyrimeve u nda duke marrë si kriter peshën e detyrimeve të secilës prej bashkive ndaj totalit të detyrimeve të prapambetura të muajit shtator 2021. Kështu, lista e bashkive që kanë përfituar më shumë fonde në total përgjatë vitit kryesohet nga Bashkia Tiranë me rreth 3.9 miliardë lekë. Më pas renditet bashkia Durrës e cila ka marrë fonde në vlerën e rreth 1.3 miliardë lekëve, bashkia Elbasan ka marrë 1.15 miliardë lekë dhe Bashkia Shkodër 1 miliardë lekë, ndërkohë që Bashkia Fier ka përfituar 980 milionë lekë.
Ndërsa transferta për bashkitë e tjera ka qenë më e moderuar. Ato që janë trajtuar më pak financiarisht janë qytetet e vogla si Libohovë apo Pustec, ku kjo e fundit ka marrë vlerën më të ulët në rreth 64 milionë lekë. Sa i takon specifikisht fondit prej 500 milionë lekësh, që shkon për detyrimet e akumuluara, pjesa më e madhe është shpërndarë për bashkitë Kavajë, Tiranë, Vorë, Belsh dhe Malësi e Madhe.
Elisabeta Dosku / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.