Sa po avancojnë shqiptarët me përdorimin online të shërbimeve në e-albania – Ja cilat kryesojnë listën
Numri i personave që kanë përdorur shërbimet e portalit qeveritar e-albania është rritur ndjeshëm. Referuar të dhënave të portalit, gjatë vitit 2017 janë regjistruar 380 312 përdorues, ku sipas tyre ky është edhe numri më i lartë i përdoruesve të regjistruar në vit. Ndërkohë, nga statistikat rezulton se 138 691 shtetas shqiptarë dhe biznese janë regjistruar gjatë këtij viti në portalin e -albania.
Sa i përket statistikave mujore, gjatë dhjetorit të vitit 2017 rezulton se certifikatat familjare janë edhe një nga dhjetë shërbimet më të përdorura në portalin e-albania, ndjekur nga vërtetimi për pagimin e kontributeve për individin.
Në vend të tretë, si një nga shërbimet më të përdorura gjatë muajit të kaluar, renditet aplikimi për leje ndërtimi. Ndërkohë, shërbime të tjera të përdorura gjerësisht nga përdoruesit janë edhe gjenerimi i kartës së shëndetit, certifikata personale, deklarimi dhe pagesa e kontributeve nga punëdhënësit, faturat e energjisë elektrike apo aplikimi për kartë shëndeti.
E-albania ka specifikuar po ashtu edhe shërbimet më të përdorura për muajin dhjetor në aplikacionin mobile, ku kryeson certifikata familjare, pasuar nga deklarimi dhe pagesa e kontributeve nga punëdhënësit si dhe faturat e energjisë.
Ndërkohë, aplikimi për pasaportë dhe kartë identiteti kryeson edhe listën e shërbimeve më të përdorura në dhjetor 2017 në Ministrinë e Punëve të Jashtme. Ndjekur nga aplikimi me prokurë të posaçme, aplikimi për përkthim dokumenti dhe aplikim për leje martese.
G.D/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.