Sa shpenzon një fëmijë për lodra? – Bazuar në të dhënat e import-eksportit, të paktën 25 euro në vit
Në total, gjatë të gjithë vitit të kaluar janë importuar plot 2.3 miliardë lekë lodra, që përkthehen në rreth 18.7 milionë euro. Për eksportin ndërkohë, vlera fiksohet në rreth 782 milionë lekë, ose 6.3 milionë euro. Deficiti tregtar fiksohet kështu në 12.4 milionë euro.
Kjo shumë duket se është e destinuar të mbetet për konsum në tregun vendas, duke pasur parasysh mungesën e një industrie të prodhimit të lodrave në vendin tonë. Sa shpenzon mesatarisht një fëmijë për lodra në një vit? Në bazë të këtyre të dhënave, për 493 mijë fëmijë që jetojnë në republikën e Shqipërisë e që janë të moshës deri në 14 vjeç, rezulton se shpenzimi mesatar për frymë është të paktën 25 euro.
Kjo shifër është më e madhe duke llogaritur faktin që çmimet në tregun me pakicë janë patjetër më të larta se çmimet e importit. Vetëm për produktet e importit, shpenzimi për frymë fiksohet në rreth 37 euro për frymë. Pa diskutim që kjo shifër është një mesatare, çka do të thotë se, ka fëmijë që shpenzojnë më shumë për lodra në vit, ashtu siç ka fëmijë të cilët nuk shpenzojnë qoftë edhe një lek të vetëm.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.