Sa të sigurtë jemi nga Covid-19? – Raporti, Shqipëria në fund të Europës, dobët me monitorimin dhe evidentimin e rasteve
Shqipëria është vendi i tretë nga fundi në Europë sa i përket sigurisë nga Covid-19. Deep Knowledge Group ka publikuar një analizë të 200 vendeve të botës duke i renditur sipas sigurisë që i ofrojnë qytetarëve të tyre nga pandemia aktuale që ka goditur globin, në bazë të disa nën-indikatorëve: si efikasiteti i qeverisjes, gatishmëria e sistemit shëndetësor, monitorimi dhe evidentimi i rasteve, apo përgatitja e emergjencave.
Shqipëria renditet e 88-ta në botë dhe ndër tre vendet e fundit në Europë, më mirë vetëm se Maqedonia e Veriut dhe Isle of man. Sa i përket nënindikatorëve, Shqipëria regjistron rezultatin më të dobët në atë të monitorimit dhe evidentimit të rasteve, ku renditemi të 98-tët në botë.
Rezultati më i mirë ndërkohë shënohet në indikatorin që i referohet gatishmërisë së sistemit shëndetësor, ku renditemi të 57-tët në botë. Madje, në këtë nën-indikator, Shqipëria regjistron rezultat më të mirë se vende si Spanja, Shtetet e Bashkuara të Amerikës apo Montecarlo. Në nivel global, në vend të parë, si vendi më i sigurt ndaj Covid-19 klasifikohet Zvicra, dhe ndiqet nga Gjermania dhe Izraeli.
Roel Korkuti / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.