Sa ton agrume prodhohen në një vit në Shqipëri, zonat që kryesojnë – Rritet prodhimi i ullirit, mbi 99 mijë ton gjatë 2016
Në vitin 2016 në Shqipëri janë prodhuar rreth 40.000 ton agrume, duke shënuar kështu një rritje me 33 për qind. Të dhënat janë bërë publike nga Instituti i Statistikave, ku ndër të tjera nivelin më të lartë të agrumeve e ka qarku i Vlorës me 23.379 ton.
“Prodhimi i agrumeve në vitin 2016 është 40.000 ton, duke shënuar një rritje prej 33,3 %, krahasuar me një vit më parë. Niveli më i lartë i prodhimit të agrumeve u arrit në qarkun e Vlorës me 23.379 ton”, thuhet në raportin e INSTAT.
Nga ana tjetër në raporti tregon numrin e rrënjëve të pemëve frutore në prodhim gjatë vitit 2016, ku totali llogaritet në 10.575.000 rrënjë. Gjithashtu raporti nënvizon se numri i rrënjëve të ullinjve në prodhim u rrit me 4.9 për qind gjatë 2016, me një total prej 6.643.000 rrënjë në prodhim.
“Numri i rrënjëve të pemëve frutore në prodhim në vitin 2016 është 10.575.000, duke pësuar një rritje me 3,8 %, në krahasim me vitin 2015. Numri i rrënjëve të ullinjve në prodhim në vitin 2016 është 6.643.000 dhe ka pësuar një rritje 4,9 %, në krahasim me vitin 2015. Numri i rrënjëve të agrumeve në prodhim në vitin 2016 është 1.044.000, duke shënuar një rritje 9,8 %, në krahasim me vitin 2015. Sipërfaqja e vreshtave në prodhim është 10, 011 Ha, duke pësuar një rritje me 1,2 %, në krahasim me vitin 2015. Prodhimi i pemëve frutore në vitin 2016 është 261.754 ton dhe u karakterizua nga një rritje prej 7,6 %, krahasuar me 2015”, thuhet në raport.
Sa i takon prodhimit të ullinjve INSTAT nënvizon se në vitin 2016 u prodhuan 99.075 ton ullinj duke pësuar një rritje me 3,2 %, krahasuar me një vit më parë.
os.de/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.