Sahin dhe gruaja e tij marrin çmim në Gjermani / Premton që BioNTech do të dërgojë 260 mln doza deri në mes të vitit
BioNTech do të dërgojë 260 milionë doza të vaksinës së Covid-19 tek Bashkimi Evropian, që është klienti më i madh, deri në mes të këtij viti, sipas themeluesit të kompanisë, Ugur Sahin. Ai foli gjatë një ceremonie, ku bashkë me gruan e tij, Oezlem Tuereci, shefen mjekësore të kompanisë, morën çmime për arritjet e tyre. Sahin tha se BioNTech dërgon aktualisht 1 milionë doza në javë dhe shtoi se kjo shifër do të rritet në 3 – 4 milionë doza në javë nga fundi i muajit Mars deri në mes të Prilit.
Në një mesazh të veçantë, lideri i unionit Krisitan Demokrat (CDU), Armin Laschet, përmendi jetën akademike të Sahin, si djali i parë i emigrantëve turkë që dha provimin e fundit tek shkolla e mesme “Erich Kaestner” në Këln, dhe studioi mjekësi përpara se të themelonte kompaninë e tij. Kryeministri izraelit, Benjamin Netanyahu, tha se vendi i tij e vlerëson arritjen e Sahin dhe shtoi se Izraeli është vendi i parë që po del nga pandemia.
Klevis Llaha – SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.