Samiti i BE për ESM – Liderët bien dakord të rrisin rolin e mekanizmit
Çështja e emigrantëve nuk ka qenë debati i vetëm mes liderëve të Bashkimit Europian.
Këta të fundit kanë diskutuar edhe për reformimin e Eurozonës, duke rënë dakord për një rol më të madh të fondit ESM, që është Mekanizmi Europian i Stabilitetit. Detajet e kësaj marrëveshje do të sqarohen në muajin Dhjetor.
Drafti i përfundimeve të bisedimeve mes liderëve nuk e përmend aspak idenë e një buxheti të përbashkët të zonës së monedhës së përbashkët, një propozim i kahershëm i Francës, që duket se është flamurtarja e reformimit të Eurozonës.
Tashmë duket se të gjitha vendet anëtare janë dakord që, të jetë Mekanizmi Europian i Stabilitetit, institucioni që duhet të ndërhyjë në rast se një prej vendeve anëtare do të ketë nevojë emergjente për të shpëtuar bankat në vështirësi.
ESM do të kishte gjithashtu një rol më të madh për të monitoruar programet e asistencës financiare.
Detajet e çdo marrëveshje të arritur në parim do të saktësohen gjatë mbledhjes së ardhshme të Eurogrupit, ku ministrat e financave do të kenë mundësi të thellojnë idetë.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.