Samiti i BE/ Udhëheqësit europian mbështesin shtrëngimin e eksporteve të vaksinave

Udhëheqësit europianë kanë mbështetur shtrëngimin e kritereve për të autorizuar eksportin e vaksinave të koronavirusit të bëra nga BE në një përpjekje për të siguruar furnizime për qytetarët brenda bllokut.

Masa pason disa javë mungesash dhe vonesash, veçanërisht lidhur me kompaninë anglo-suedeze AstraZeneca, e cila ka shkaktuar zhgënjim në të gjithë kontinentin.

Brukseli ka në plan të përfshijë parimet e “proporcionalitetit dhe reciprocitetit” në mekanizmin e transparencës që u prezantua në fund të janarit dhe do të vlerësojë “rast pas rasti” kërkesat e eksportit nga kompanitë farmaceutike.

Kjo do të thotë se vendet udhëheqëse të vaksinimit si Mbretëria e Bashkuar mund të përballen me një detyrë më të vështirë për të marrë vaksina nga vendet e BE-së.

Kryeministri Holandez Mark Rutte tha se udhëheqësit e BE-së i kishin parë kufizimet e reja të eksportit të vaksinave të Komisionit si “të pranueshme”, por shtoi se ai shpresonte që ajo të mos përdoret kurrë.

Presidentja e Komisionit Europian Ursula Von der Leyen konfirmoi të enjten se BE ka eksportuar 77 milion doza vaksinash në 33 vende që nga 1 Dhjetori 2020. Si një donator kryesor i COVAX, ai gjithashtu ka kontribuar në eksportet në vendet me të ardhura të ulëta dhe të mesme.

Ajo u bëri thirrje kompanive farmaceutike të respektojnë kontratat e tyre dhe të përputhen me “hapjen” e Europës kur bëhet fjalë për shpërndarjen e vaksinës COVID-19.

Ajo tha se Europa ishte në fillim të një vale të tretë dhe megjithëse nivelet e vdekshmërisë janë më të ulëta ajo thekson rëndësinë e një programi të vaksinimit të shpejtë dhe efikas. Von der Leyen tha se 88 milion doza ishin dorëzuar në Europë dhe 62 milion doza të administruara.

Udhëheqësit diskutuan gjithashtu Turqinë dhe bisedimet midis Ankarasë dhe BE mbi një marrëdhënie më të ngushtë me bllokun. (EN)

E . S / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.