Samiti i Londrës – Merkel: Projektet madhore, në shërbim të integrimit
U zhvillua të martën në Londër samiti i pestë i Ballkanit Perëndimor, që përfaqëson etapën e radhës në të ashtuquajturin Proces i Berlinit. Ky proces synon shpejtimin e integrimit të vendeve të rajonit tonë në Bashkimin Europian.
Fokusi i Samitit të mbajtur në Londër ishte konsolidimi i stabilitetit ekonomik, përmes forcimit të marrëdhënieve ndërrajonale dhe klimës së biznesit.
Në fjalën e saj pas samitit, kancelarja gjermane, Angela Merkel, bëri thirrje për një bashkëpunim më të madh mes vendeve anëtare të kësaj nisme. Sipas saj, projektet madhore në infrastrukturë duhet t’i shërbejnë integrimit të vendeve të Ballkanit Perëndimor.
Kryeministrja britanike, Theresa May, bëri thirrje për një luftë më të fortë ndaj krimit të organizuar dhe kërkoi forcimin e administratës së vendeve të rajonit.
“Historia ka dëshmuar se stabiliteti dhe siguria e rajonit të Ballkanit Perëndimor nënkupton një Europë më të qëndrueshme dhe më të sigurtë”, deklaroi May, e cila tha se Britania vërtet po largohet nga BE-ja, por mbetet e përkushtuar për përparimin e prosperitetit dhe sigurisë të Ballkanit Perëndimor.
Paketa e masave për këtë qëllim përfshin rritjen me 95% të financimit britanik në rajon, nga 41 milionë në 80 milionë stërlina. Gjithashtu do të dyfishohet numri i britanikëve që do të punojnë në rajon, në çështjet e sigurisë që ndikojnë në Britaninë e Madhe dhe në Ballkan.
Diskutimet e samitit u konfirmuan në konferencën për shtyp, që kryeministrja britanike May zhvilloi bashkë me Kancelaren gjermane Angela Merkel, dhe kryeministrin polak Mateusz Morawiecki, i cili do të organizojë samitin e radhës të Ballkanit Perëndimor vitin e ardhshëm.
Samiti i Londrës bëri bashkë liderët e 6 vendeve të rajonit, ndërsa pasditen e të martës ishte në program edhe një takim mes kryeministrit të Shqipërisë, Edi Rama, dhe homologut të tij grek, Alexis Tsipras. Në takim, besohet se janë diskutuar disa prej problemeve të ngelura pezull mes dy vendeve, duke filluar nga marrëveshja për kufirin detar.
Ersuin Shehu/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.