Samsung, në vështirësi – Fitimi përgjysmohet për tremujorin e dytë radhazi
Gjiganti korean, Samsung, deklaroi se fitimi për tremujorin e dytë u përgjysmua për shkak të rënies së çmimeve të procesorëve. Fitimi operues për tremujorin preku 5.6 miliardë dollarë, në rënie me 55.6% nga e njëjta periudhë një vit më parë. “Rënia e çmimeve të cipeve të memories ka vazhduar dhe rimëkëmbja e kërkesës ka qenë e limituar”, deklaroi Samsung.
Vlera në treg e kompanisë ra me 2.6% në nisje të tregtisë. Samsung bëri të ditur se biznesi i procesorëve gjeneroi 2.8 miliardë dollarë për tremujorin, në rënie me 71% me bazë vjetore. Ky është tremujori i dytë radhazi që fitimi i gjigantit korean përgjysmohet. Në tremujorin e parë, fitimi i Samsung ra me 60% në 5.4 miliardë dollarë. Industria botërore e procesorëve ndodhet në një periudhë të përshtatjes së inventarëve që po mban kërkesën e ulët dhe po limiton çmimet.
Prodhuesit korean të cipeve po përballen gjithashtu me konfliktet tregtare me Japoninë. Biznesi i telefonave të Samsung gjeneroi 1.8 miliardë dollarë fitime, në rënie me 42%. Samsung do të prezantojë Note 10 në muajin Gusht dhe do të nxjerrë në treg Galaxy Fold një muaj më vonë.
Klevis Llaha / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.