Sanksione ndaj Venezuelës – SHBA gati të veprojë, por pret të tjerët
Shtetet e Bashkuara të Amerikës janë të gatshme që të zgjerojnë sanksionet ndaj Venezuelës, pas ngjarjeve të fundit në vend, duke ngrirë asetet për 20 njerëz të lidhur ngushtë me presidentin Maduro, nga 10 që ishin në sanksionet ekzistuese.
Gjithsesi, Shtetet e Bashkuara nuk duan që të veprojnë të vetme, dhe po kërkojnë edhe mbështetjen e të tjerëve, sidomos nga vendet e Amerikës latine.
Gjatë javës, në Lima të Perusë do të takohen përfaqësues nga 11 vende të Amerikës latine si edhe Kanadaja dhe do të diskutojnë ngjarjet e fundit në Venezuelë, dhe ndryshim e kushtetutës së vendit. Presidenti peruan, ka kërkuar një përgjigje unanime nga vendet e rajonit.
Sanksionet shtesë mund të shërbejnë për të rritur presionin ndaj presidentit venezuelian, cili po udhëheq me dorë të hekurt ndaj kundërshtarëve të tij, si institucionalë ashtu edhe në popullsi.
Venezuela është në një krizë të paprecedentë ekonomike që ka marrë tashmë përmasat e një krize humanitare, me pjesën dërrmuese të popullsisë në varfëri ekstreme.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.