Sanksionet perëndimore ndaj Rusisë bëhen efektive – Në fundjavë kanë hyrë në fuqi shumë masa, përfshirë ndalimin nga SWIFT

Sanksionet e vendosura nga Shtetet e Bashkuara dhe vendet e tjera perëndimore, për të hequr disa banka ruse nga sistemi i pagesave SWIFT, janë bërë efektive këtë fundjavë.

Më datë 26 Shkurt, Shtëpia e Bardhë lajmëroi se SHBA, së bashku me vendet e Bashkimit Europian dhe Kanadanë, do të heqin disa banka ruse nga sistemi i mesazheve dhe pagesave ndërbankare SWIFT, një lëvizje e madhe që i dha vrull ndëshkimeve ekonomike të perëndimit ndaj Moskës, për sulmin në Ukrainë.

Duke nisur nga 26 Marsi, institucionet më të mëdha financiare ruse, përfshirë 2 bankat më të mëdha VTB dhe Sberbank, nuk do të lejohen më që të procesojnë pagesa përmes sistemit SWIFT.

Data shënon gjithashtu afatin për të gjithë institucionet financiare amerikane që të mbyllin çdo llogari korrespondente dhe të refuzojnë çdo transaksion të ardhshëm me Sberbank.

Kjo lëvizje është ndjekur nga shumë vende dhe rajone të tjera.

Më datë 2 Mars, Bashkimi Europian lajmëroi një listë të bankave ruse që do të përjashtohen nga SWIFT dhe masat u bënë efektive më 12 Mars.

Më datë 24 Mars, Washingtoni theksoi se do të zgjerojë sanksionet ndaj enteve ruse të biznesit dhe individëve.

Qeveria Zvicerane theksoi se ka ngrirë mbi 6 mld dollarë aktive ruse në vlerë.

Japonia ndoqi më vonë gjatë muajit me sanksione shtesë ndaj Rusisë, përfshirë ngrirjen e më shumë aktiveve dhe ndalimin e eksporteve drejt organizatave ruse.

Në kundërpërgjigje të këtyre sanksioneve perëndimore, Rusia zyrtare i ka kërkuar Europës që të paguajë për gaz në rubla.

Klevis Llaha / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.