Sarajeva organizon për herë të parë panairin ‘Hallall’ – Mirëpret 100 pjesëmarrës nga 30 vende

Një panair ndërkombëtar i industrisë hallall po përgatitet të hapë dyert e tij në kryeqytetin e Bosnje Hercegovinës nga data 27 deri në 29 shtator. Panairi Hallall i Sarajevës (SHF) do të presë rreth 100 pjesëmarrës nga 30 vende.

Pjesëmarrësit nga vendet e Ballkanit, duke përfshirë Serbinë, Slloveninë dhe Shqipërinë, si dhe nga Turqia, Arabia Saudite, Emiratet e Bashkuara Arabe, Malajzia dhe vendet e BE-së do të prezantojnë produktet ushqimore hallall në panairin 3-ditor.

Kreu i Agjencisë për Certifikimin e Cilësisë Hallall në Bosnje Hercegovinë, Damir Alihodzic tha se ky panair ka një rëndësi të veçantë si për konsumatorët, ashtu edhe për prodhuesit në vendet e tjera.

“Prodhuesit hallall të ushqimit do të kenë mundësinë të prezantojnë produktet e tyre këtu dhe kjo do të jetë e dobishme për konsumatorët dhe prodhuesit e vendeve të tjera”, u shpreh ai.

Në Bosnje Hercegovinë janë rreth 90 firma që kanë certifikatat ushqimore hallall, ndërsa në rajon numërohen më shumë se 130 prodhues dhe mbi 7000 produkte të certifikuara hallall.

G.D/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.