Schaeuble për BQE: “Rritja e fortë e rajonit duhet të sjellë përfundimin e stimujve monetarë”
Rritja ekonomike në Eurozonë është më e fortë se sa pritej dhe kjo do të ofrojë mundësinë që Banka Qendrore Europiane të normalizojë në mënyrë graduale politikat monetare dhe të përfundojë situatën e “çmendur” të normave negative të interesit, tha Ministri gjerman i Financave, Wolfgang Schaeuble.
Zyrtarët e lartë të Qeverisë gjermane i kanë kërkuar institucionit në Frankfurt që të tërheqë stimujt monetar me blerjet e obligacioneve dhe normat e interesit nën-zero, ndërkohë që zgjedhjet në ekonominë më të madhe të Europës po afrojnë dhe votuesit po ankohen për kthimet e ulëta nga kursimet.
Kritikët e programit të blerjes së BQE në tregjet dytësorë argumentojnë gjithashtu se kjo ka reduktuar presionet ndaj qeverive të Eurozonës për të zbatuar reformat. Schaeuble tha se Eurozona po rimëkëmbet me hapa surprizuese dhe se kërcënimi i deflacionit është zhdukur.
“Nëse rritja është fuqizuar dhe shqetësimet nga deflacioni janë larguar, atëherë BQE duhet të nisë në mënyrë të ngadaltë normalizmin e politikave monetare”, tha ministri duke shtuar se kjo procedurë nuk mund të bëhet menjëherë për shkak të problemeve në disa vende të Europës. Sipas Schaeuble, situata duhet të rikthehet në normalitet, ku normat e interesit të shkojnë në nivelin që kanë qenë përpara programit të stimujve.
Ai theksoi gjithashtu se qeveritë e Eurozonës kanë ende detyra për të bërë në lidhje me reformat.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.