Seanca dëgjimore në Kuvend/ Cilët janë 2 kandidatet e zgjedhura për drejtimin e Inspektoriatit të Lartë të Deklarimit të Pasurive

Komisioni për Çështjet Ligjore, Administratën Publike dhe të Drejtat e Njeriut në drejtimin e kryetarit Ulsi Manja dhe në cilësinë e komisionit përgjegjës, në mbledhjen e radhës zhvilloi një seancë dëgjimore me 5 kandidaturat për pozicionin e Inspektorit të Përgjithshëm të Inspektoriatit të Lartë të Deklarimit dhe Kontrollit të Pasurive dhe Konfliktit të Interesave.

Kandidatët për kreu e ILDKPKI-së ishin: znj.Dhimitrula Spiro, znj.Evgjeni Bashari, znj. Evis Fico, znj.Helena Papa, znj.Lefterije Luzi, ndërsa z.Eridian Salianji është tërhequr nga kandidatura. Relatore të raportit për komisionin u caktuan znj.Klotilda Bushka dhe znj.Ediola Braha.

Në nisje të seancës dëgjimore, z.Manja parashtroi se në zbatim të detyrimeve ligjore, Komisioni më datën 20 nëntor 2020, ka evidentuar vakancën e cila duhet të bëhet 3 muaj përpara përfundimit të mandatit të kreut aktual të ILDKPKI-së, z.Shkëlqim Ganaj.

Kandidatët bënë një prezantim të arsyeve që i shtynë për të kandiduar të lidhura me përvojën profesionale në fushat e luftës kundër korrupsionit, kontrollit të pasurive, auditimit financiar të funksionarëve publikë, etj, si dhe iu përgjigjën pyetjeve të deputetëve të komisionit.

Pas dëgjesave, komisioni votoi nominalisht të gjitha kandidaturat dhe në përfundim miratoi raportin për dërgimin për votim në seancë plenare të kandidaturave të znj.Evgjeni Bashari dhe znj.Helena Papa.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.