Sejko në Klubin e Guvernatorëve të Azisë Qendrore: Normalizimi monetar në Europë, jo efekte negative në Shqipëri

“Normalizimi monetar në Evropë, nuk pritet të ketë efekte negative në Shqipëri”, tha Guverantori i Bankës së Shqipërisë Gent Sejko gjatë fjalës së tij në takimin e 38^të të Klubit të Guvernatorëve të vendeve të Azisë Qendrore, Rajonit të Detit të Zi dhe Ballkanit.

“Madje këto efekte mund të jenë pozitive, duke pasur parasysh sinkronizimin që gëzon politika monetare e Bankës së Shqipërisë me atë të Bankës Qendrore Evropiane si dhe integrimin aktual që ka Shqipëria në tregjet evropiane”.

Diskutimet e këtij takimi ishin fokusuar në dy drejtime kryesore: teknologjitë financiare, trendet botërore dhe kuadri rregullator; si dhe normalizimi i politikës monetare të Bankës Qendrore Evropiane dhe Bankës së Anglisë e ndërlikimet e mundshme për ekonomitë e vendeve anëtare të Klubit.

Guvernatori theksoi se Banka e Shqipërisë mbetet e gatshme të marrë të gjitha masat e nevojshme duke dhënë kontributin e saj në mbështetje të një rritjeje ekonomike të qëndrueshme dhe garantimit të stabilitetit makroekonomik të vendit.

Përsa i përket zhvillimit teknologjik, Guvernatori Sejko parashtroi masat e ndërmarra nga Shqipëria në drejtim të inovacionit dhe digjitalizimit. Nga ana tjetër, Sejko theksoi se sistemi bankar sot prezantohet me produkte inovative, duke ndjekur zhvillimet e fundit në fushën e shërbimeve të këtij lloji.

Takimi i Klubit të Guvernatorëve u zhvillua në Moskë, ku drejtohej nga Guvernatorja e Bankës së Rusisë, Elvira Nabiullina dhe në të merrnin pjesë drejtuesit e bankave qendrore të 24 vendeve anëtare të Klubit.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.