Sejko: Shqipëria po përjeton një rimëkëmbje të qëndrueshme ciklike, me rritje të përshpejtuar gjatë 3 viteve të fundit
“Shqipëria po përjeton një rimëkëmbje të qëndrueshme ciklike, me rritje të përshpejtuar gjatë tre viteve të fundit, duke e afruar ekonominë vendase drejt ekuilibrit.” Kështu është shprehur Guvernatori i Bakës së Shqipërisë, gjatë Forumit për vendet e Europës Qendrore dhe Lindore i realizuar nga “Euromoney”.
Sipas Sejkos, qëndrimi i politikës monetare të BQE-së ka një ndikim të fortë dhe të drejtpërdrejtë në ekonomitë dhe sistemet financiare të rajonit. Ndërsa u ndal te shtrëngimi i kushteve monetare në Eurozonë, i cili pritet të ndodhë parallel me reduktimin e stimulit monetar në Shqipëri, Sejko deklaroi se nuk do të ketë efekte të forta negative nga përfundimi i programit.
Sipas tij, flukset hyrëse të investimeve të huaja në Shqipëri kanë qenë të natyrës së drejtpërdrejtë, në prodhimin e energjisë dhe të burimeve natyrore, prandaj kjo nuk do të sillte një largim të kapitalit apo stres të borxhit. Ai shtoi se ekspozimi i sektorit privat shqiptar në tregjet e borxhit është minimal, kjo pasi biznesi shqiptar financohet në masë të madhe përmes fondeve private ose nëpërmjet sektorit bankar vendas.
Forumi u mbajt në datat 15-16 janar në Vjenë dhe ishte konceptuar në formën e paneleve me tema specifike, ku diskutimi u fokusuan zhvillimet më të fundit ekonomike në vendet e Europës.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.