Sejko, takim me ambasadorin e ri të OSBE. Diskutojnë për ecurinë e ekonomisë gjatë periudhës së pandemisë
Guvernatori i Bankës së Shqipërisë, Gent Sejko zhvilloi një takim zyrtar me Ambasadorin e ri të OSBE-së në vendin tonë, Vincenzo Del Monaco, i cili mori detyrën në 16 nëntor 2020. Gjatë takimit, Guvernatori Sejko e njohu Ambasadorin Del Monaco me zhvillimet financiare në vend, ku në krye të bisedës ishte trajtimi i situatës së krijuar nga pandemia COVID-19 dhe efektet e saj në ekonominë shqiptare.
Guvernatori u shpreh se si pasojë e masave të kujdesit të marra për kontrollin e përhapjes së pandemisë, ekonomia shqiptare gjatë vitit 2020 shënoi një rënie, por falë kontributit të Bankës së Shqipërisë dhe politikave të mirëkoordinuara makroekonomike, pritet që aktiviteti ekonomik të rikuperohet gradualisht gjatë vitit 2021.
Nga ana e tij, Ambasadori Del Monaco vlerësoi punën e bërë nga Banka e Shqipërisë në drejtim të zbatimit të reformave ekonomike, strukturore e sektoriale, dhe vlerësoi kontributin e rëndësishëm që po jepet në procesin e integrimit evropian të vendit.
Lidion Kulla / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.