Sejko, takim me misionin e FMN: “Rritja ekonomike do të përmirësohet në vijim”
Guvernatori i Bankës së Shqipërisë, Gent Sejko, priti në një takim misionin e Fondit Monetar Ndërkombëtar (FMN), të kryesuar nga Jan Kees Martijn, shefi i misionit për Shqipërinë.
Ky takim u zhvillua në kuadër të diskutimeve për Artikullin IV me misionin e FMN-së në vendin tonë. Çështjet e diskutuara gjatë këtij takimi ishin zhvillimet makroekonomike dhe pritjet për rritjen ekonomike, inflacionin, kursin e këmbimit, zhvillimet në sektorin bankar, kreditimin, kreditë me probleme për periudhën në vijim.
Guvernatori Sejko u shpreh se rritja ekonomike ka vijuar trendin rritës, ndonëse me një ritëm më të ngadaltë, por do të vijë në përmirësim gjatë dy viteve të ardhshme, duke mundësuar kthimin e inflacionit në objektiv në afat të mesëm.
Për sa i përket sektorit bankar, Guvernatori theksoi se ai paraqitet i qëndrueshëm, me tregues që evidentojnë një ambient financiar të gatshëm për të mbështetur më tej zhvillimin ekonomik të vendit. Kredia për sektorin privat shënoi një rritje mesatare prej 7.5% në tremujorin e tretë 2019.
Oferta e kredisë bankare ka ardhur në rritje si pasojë e përmirësimit të vazhdueshëm të ambientit të kreditit dhe të bilancit të sektorit bankar – sikundër tregohet nga rënia në nivelin 10.6% e raportit të kredive me probleme – por edhe nga rritja e konkurrencës në sektor, me përfundimin e procesit të konsolidimit të sektorit bankar.
Në ditët në vijim, misioni i FMN-së do të zhvillojë takime me drejtues të lartë pranë Bankës së Shqipërisë dhe Ministrisë së Financave dhe Ekonomisë, me qëllim diskutimin më në detaje të çështjeve të ndryshme lidhur me ecurinë e ekonomisë së vendit.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.