Sejko, takim me Shoqatën e Bankave/ Diskutohet për Byronë Kombëtare të Kredisë dhe “Qasjen e Tiranës”
Guvernatori i Bankës së Shqipërisë, Gent Sejko, zhvilloi një takim me anëtarët e Bordit Drejtues të Shoqatës Shqiptare të Bankave, të kryesuar nga Kryetari i saj, Silvio Pedrazzi.
Takimi u zhvillua në kuadër të dialogut të vazhdueshëm mes Bankës së Shqipërisë dhe aktorëve të sektorit bankar, mbi çështje që lidhen me aktivitetin dhe rolin e tij në ekonomi.
Guvernatori Sejko u ndal në zhvillimet kryesore ekonomike në vend në gjysmën e parë të vitit, dhe veçanërisht në ecurinë e sektorit bankar, ku theksoi se të dhënat e fundit tregojnë një përmirësim të aktivitetit të këtij sektori në drejtim të kredidhënies, si dhe në uljen e kredive me probleme.
Ndërsa kryetari i Shoqatës Shqiptare të Bankave, Silvio Pedrazzi, njohu Guvernatorin Sejko me punën e deritanishme të shoqatës për krijimin e Byrosë Kombëtare të Kredisë.
Krijimi dhe vënia në funksionim e kësaj byroje është një vlerë e shtuar për sektorin bankar, falë rolit që do të luajë në vlerësimin e kredimarrësve sipas nivelit të rrezikut.
Duke vlerësuar rëndësinë e këtij projekti, Guvernatori Sejko u shpreh se Banka e Shqipërisë do të japë mbështetjen e saj të plotë për realizimin dhe funksionimin e këtij projekti të ndërmarrë nga Shoqata Shqiptare e Bankave.
Një tjetër çështje më rëndësi e trajtuar gjatë takimit ishte rregullorja “Për trajtimin jashtëgjyqësor nga bankat, të kredimarrësve në vështirësi financiare” – miratuar së fundmi në mbledhjen e fundit të Këshillit Mbikëqyrës dhe e quajtur ndryshe “Qasja e Tiranës”.
Qëllimi i kësaj rregulloreje është lehtësimi i rimëkëmbjes financiare të kredimarrësve të mëdhenj në vonesë, të cilët kanë ekspozim në më shumë se një bankë.
Lidion Kulla/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.