Sejko, vlerësime për bankat: “Po ndihmojnë më së miri ekonominë për të përballuar krizën”
Sektori bankar po ndihmon ekonominë në përballimin e pasojave të krizës. Guvernatori i Bankës së Shqipërisë, Gent Sejko, tha pas mbledhjes së Këshillit Mbikëqyrës se bankat po përmbushin më së miri misionin e tyre, jo vetëm duke marrë përsipër një kosto të konsiderueshme nga shtyrja e kredive, por edhe duke vijuar kreditimin e ekonomisë. Madje, edhe raporti i kredive me probleme shënoi një tjetër rënie të lehtë në muajin maj dhe zbriti në nivelin 8.1%, megjithëse impakti i vërtetë i krizës në këtë tregues do të qartësohet në tremujorin e fundit të vitit.
Guvernatori përsëriti se rritja e borxhit publik në këtë situatë është një sakrificë e domosdoshme për të shmangur pasoja të rënda në ekonomi. Ai inkurajoi qeverinë të vazhdojë të përdorë stimujt fiskalë për të mbështetur sektorin privat.
Guvernatori tha se pasojat e krizës janë tashmë të prekshme, të ilustruara me një rënie të ekonomisë prej 2.52% në tremujorin e parë dhe e humbjen e 17 mijë vendeve të punës. Sejko tha se kriza do të arrijë pikun në tremujorin e dytë, ndërsa në gjysmën e dytë të vitit rënia pritet të jetë më e kufizuar.
Skenari bazë i Bankës së Shqipërisë parashikon rënie të ekonomisë shqiptare për vitin 2020 dhe një rimëkëmbje të shpejtë në vitin 2021. Por, ky skenar ngelet i lidhur ngushtë me ecurinë e epidemisë së Covid-19. Një përkeqësim i situatës, në formën e një vale më të rëndë dhe të shoqëruar me kufizime të reja, do të reflektohej në përkeqësim më afatgjatë të treguesve ekonomikë. Megjithatë, Guvernatori tha se për momentin nevoja për të përdorur një plan kontigjence në formën e programit të lehtësimit sasior është më e largët. Këshilli Mbikëqyrës vendosi të mërkurën të mbajë normën bazë të interesit të pandryshuar në nivelin 0.5%.
Ersuin Shehu / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.